老北京

到老北京食晚飯，如果想食北京烤鴨，記得提早預定。

今晚我同友人一行9人，因為要等朋友，所以叫了多款前菜，水準都非常不錯。四喜烤麩、醬豬耳絲，醬料惹味，非常入味。涼拌白菜芯、涼拌萵筍，做得非常清爽。

主菜選了店員力推的米粉肉，無論賣相同味道都極似梅菜扣肉，只是比較甜一點。北京烤鴨，鴨味淡，可能用冰鮮鴨都會影響質素呢，反而津白豆腐鴨骨湯味道還濃。松鼠桂魚，魚先炸再會酸甜汁，味道比其他食館做得好。木耳淮山，上湯莧菜，清清地，食得舒服。孜然羊肉，香而不羶，北京炸醬麵，味道濃郁。

另外包點方面則選了蔥油餅、茴香豬肉餃子及番茄蛋餃，各有特色。甜點必選拔絲香蕉，再貪心的要多客高麗豆沙，一定要立刻食，否則影響口感。

老北京
渣甸街50號渣甸中心

注: 鄰近銅鑼灣地鐵站，新寧道有時租停車場。

得閒睇下我的專頁丫 ^^

https://www.facebook.com/juliatsui88?

期待已久的約會

期待已久，想到皇仁書院舊生會食飯需要預訂最少兩個月，今次有幸朋友預定了一圍，同各為食老友大快朵頤一番，真係爽。

不愧為其中一個難訂位的會所，每味菜都有其特色，加上賣相吸引，招呼一流，令人回味。

子蘿鴿片，合時令的子薑加菠蘿非常惹味，鴿片軟滑。

桂花蜜桶蠔，外脆內軟，入口桂花味道香甜，再咬一口濃濃的蠔味充滿口內。

佛跳墻，必食之選，足料鮮甜。

鵝掌柚皮菜膽，柚皮好厚，鵝掌炆得非常腍，這味心機菜做得好。

蛋白花雕蒸花蟹，一上菜酒香四溢，蟹肉鮮甜。

椒鹽陳皮大蝦，味道好特別，甜甜鹹鹹的，有點像八仙果，還好沒有蓋過蝦的鮮味。

美極炒龍躉，實在香，美極帶出鮮味，炒得夠鑊氣，薑蔥都搶著食。

炸子雞，比較差的，完全無雞味，反而墊底的糖子薑重受歡迎。

薑蔥蝦子撈麵，薑蔥香，麵還算乾身。

芉頭炒飯，炒得粒粒分明，芋頭香，蝦米粒香脆，飽到食唔落都食咗半碗。

腰果湯圓露，本來好有期望，可惜湯圓粉粉的像未熟透，餡料味道也麻麻，失色點。

大夥兒嘻嘻哈哈，食到有心機做的菜式實在難得，幾時再有機會來呢？

皇仁書院舊生會﹝中菜部﹞
銅鑼灣高士威道120號

注: 鄰近天后地鐵站，附近有咪錶車位。

得閒睇下我的專頁丫 ^^

https://www.facebook.com/juliatsui88?

第一腸粉

到太子買東西，順道到第一腸粉食個妟。要了燒鴨腸加菜乾粥，粥先到，一望已知足料，食落更知粥綿夠火候。腸粉屬即拉腸，厚薄適中，每啖也有燒鴨香味。

第一腸粉專賣店
太子砵蘭街384號地鋪

注: 鄰近太子或旺角東地鐵站，新世紀廣場提供時租停車場，附近也有咪錶泊車車位提供。

得閒睇下我的專頁丫 ^^

https://www.facebook.com/juliatsui88?

agnès b. Café LPG

agnès  b. Café LPG 咖啡出名，原來蛋糕也唔錯。今次選了3重朱古力，朱古力濃度夠，又軟又滑，配合cappuccino 的香濃，真係天衣無縫。

agnès b. Café LPG
沙田正街18號新城市廣場1期3樓390號舖

注 : 鄰近沙田地鐵站，新城市廣場提供時租車位。

得閒睇下我的專頁丫 ^^

https://www.facebook.com/juliatsui88?

一次過食牛三寶

到花墟買嘢，附近搵食，見牛棚用牛做主打，就試下五香牛三寶河，一次過食三個部位，啱晒我貪心嘅性格。碗粉嚟到我望到都幾開心，似模似樣，材料十足。牛肚入味，牛腩啖啖肉，好彩唔會嚡口無黐牙，咬落牛肉味非常濃，牛筋非常腍，但亦保持牛筋的口感，整體來說係稍為鹹咗少少，可能個人問題，所以我只飲一半湯，但食後都無口渴，唔似味精，值得再試。

牛棚
太子花園街213A地下

注: 鄰近太子或旺角東地鐵站，新世紀廣場提供時租停車場。

得閒睇下我的專頁丫 ^^

https://www.facebook.com/juliatsui88?

大澳食飯

假日到大澳行行，天氣開始熱，一到步就想到豆腐花，黑白加凍椰汁西米豆腐花。黑白其實係芝麻糊豆腐花，豆腐花果真滑一滑，芝麻糊都唔錯㗎。

走走就到晚飯時間，友人一早預定了八寶鴨，其他餸菜都是酒家發板，先來個䅇米魚肚羮，實在太耐沒有食過咁豐富的魚肚羮，好滿足。白灼蝦勝在新鮮，八寶鴨足料，可惜今日老板太忙，沒有時間做腰果露，唯有寄望下㳄。

益昌小食店
大澳永安街

海韻素食菜館
大澳南涌村13B

注:東涌站地鐵站有接駁巴士直到大澳

得閒睇下我的專頁丫 ^^

https://www.facebook.com/juliatsui88?